For di 31 di mart 2020 Kámara di Komèrsio Boneiru tin un ‘Lokèt di sosten di Corona pa empresario’. E Lokèt di sosten di Corona di Kámara di Komèrsio tin un bista general total di tur medida di sosten ku a keda introdusí i ta ofresé konseho integral i sosten na momentu di hasi petishon.

Impakto di e medidanan kontra plamamentu di e vírùs di Corona ta grandi pa mundu empresarial boneriano. Pa empresarionan ta konta ku tin limitashon pa loke ta trata e manera ku nan tin mag di ehersé nan negoshi, prinsipalmente den sektor turístiko. Kámara di Komèrsio ta risibí sierto señalnan ku empresarionan ta sumamente preokupá pa motibu ku nan no por kumpli ku nan obligashonnan finansiero debí na fluhonan di entrada ku a bira ménos òf asta para kompletamente. Esaki ta resultá tambe for di e enkuesta ku a tene bou di empresarionan na Boneiru tokante e krísis di COVID-19.

Nos gobièrnu lokal huntu ku gobièrnu di Reino a bini ku un pakete ámplio ku areglo pa duna sosten na empresarionan i pa mas tantu posibel mantené kuponan di trabou den e periodo di krísis aki. Ehekushon di e areglonan aki ta repartí entre diferente instansia: unidat di Asuntunan Sosial i Empleo di RCN, Entidat Públiko Boneiru, Servisio di Reino pa Hulanda Empresarial (Rijksdienst voor Ondernemend Nederland – RVO), Servisio di Impuesto Hulanda Karibense (Belastingdienst Caribisch Nederland – BCN), bankonan lokal i Qredits. E echo ku ehekushon di e medidanan aki ta repartí entre diferente instansia, ku kada un tin nan propio kondishonnan i forma di traha, por ta un opstákulo pa empresarionan ku na e momentunan aki mester di yudansa rápido, konkreto i ku no ta laga ningun duda pa garantisá kontinuidat di operashon di nan negoshi.

Pa e motibu aki Kámara di Komèrsio a habri un ‘Lokèt di sosten di Corona pa empresario’. E lokèt tin un bista general total di tur areglo eksistente, di manera ku e por ofresé sosten i konseho na un manera integral. Ku esaki ta proveé den nesesidat di informashon ku empresarionan tin i alabes e ta fasilitá e prosesonan di petishon pa e areglonan aki. Empresarionan por aserká e Lokèt di sosten di Corona ku:

• Pregunta tokante medidanan di sosten ku ta aplikabel;
• Yudansa pa yena e dokumentunan di petishon;
• Informashon tokante otro asuntunan relevante, inkluso guia na momento di reedifikashon di empresanan.

En bista di e instrukshonnan rònt di ‘distansiamentu sosial’ e Lokèt di sosten di Corona ta prinsipalmente un lokèt digital, kaminda e komunikashon primario ta tuma lugá via imeil. Empresarionan por pidi informashon via telefon tambe i, si ta nesesario, ta tene un ‘video conference’. Ta ofresé sosten den e idiomanan papiamentu, hulandes, ingles i spañó.

Por splika e detayenan di e areglonan di Reino i Entidat Públiko Boneiru na empresarionan. Lo publiká informashon tokante esaki riba wèpsait i página di facebook di Kámara di Komèrsio.

Kámara di Komèrsio por duna mas informashon tambe tokante e garantia di BKMB-C ku ta fasilitá petishonnan relatá ku Corona na bankonan.