For di 2012 Boneiru ta un munisipio spesial di Hulanda, konosí tambe komo ‘Entidat Públiko’. Boneiru ta situá den e parti sùit di Laman Karibense, dilanti di kosta di Venezuela, i ta pertenesé na e islanan ABC di Antianan Menor.

Boneiru tin algun haf di laman, di kua esun di Playa ta esun mas importante. Den e di dos mitar di siglo 20 a renobá e dos wafnan pa mara barku den haf di Playa, di manera ku banda di barku di karga i barku di kònteiner, barkunan krusero grandi tambe por mara fásilmente. Resientemente a renobá Waf Nelson Petrus ‘Nello’ Craane (waf di sùit). E otro hafnan ta pertenesé na e empresanan BOPEC, WEB/CUROIL, Oil Trading Bonaire (OTB) i Cargill. Banda di esei Boneiru ta disponé di un aeropuerto internashonal ku e nòmber Flamingo Airport. Kòrsou, Aruba, Amsterdam, New York, Miami, Atlanta i Houston ta e destinashonnan mas importante ku por alkansá direktamente for di Boneiru.

Konforme e konteo di aña 2024 Boneiru tin 25.133 habitante. Na aña 2001 86% di nos poblashon tabatin nashonalidat hulandes, pero solamente 52% tabata nasé na Boneiru mes. Banda di hopi hende for di e otro islanan Kòrsou i Aruba, for di Hulanda i e paisnan besiña Venezuela i Colombia, tin hopi hende for di República Dominicana ta biba na Boneiru. E idioma ofisial ta hulandes. Papiamentu i ingles tambe ta rekonosé komo idioma ofisial den tráfiko hurídiko i gubernamental, den enseñansa, den bida sosial-ekonómiko i den hurisdikshon. 64% di nos poblashon ta papia papiamentu na kas.

E sektornan ekonómiko mas importante ta turismo, agrikultura (inkluyendo produkshon di salu) i e sektor di servisio. Boneiru ta konosí komo un di e parkenan di naturalesa bou di laman mas bunita na mundu i pa e motibu ei nos isla ta hopi popular serka sambuyadónan rekreativo. Banda di esei e sektor di restorant i hotèl ta un sektor importante na Boneiru. Na e parti nort di Boneiru nos ta haña ‘Parke Nashonal Washington Slagbaai’ i produkshon di salu natural ta kubri e parti sùit di nos isla. Na aña 2023 171.000 hende a bishitá nos isla. E kantidat di bishitante ku a bini ku barku krusero tabata 56.600 na aña 2021. Agrikultura ta tuma lugá na e tereno di LVV (Agrikultura, Krio di Bestia i Peska). Nos gobièrnu lokal ta manehá e tereno aki. Mas aleu gobièrnu, konstrukshon i kuido ta dunadónan di trabou importante na Boneiru. Fuente: CBS

Hasi negoshi na Boneiru ta ofresé sufisiente oportunidat i desafio pa empresarionan nobo. Den e diferente sektornan tin nesesidat pa ideanan inovativo i ta surgi vários oportunidat, tantu riba eskala mas grandi komo riba e merkadonan spesialisá. Sostenibilidat ta un palabra ku ta mará inseparabelmente ku Boneiru. Gustosamente Boneiru ke desaroyá su mes komo ‘Blue Destination’. Esaki ta enserá ku preferibelmente produktonan òf servisionan tin un enraisamentu fuerte ku Boneiru, ku bentahanan ta yega na poblashon lokal tambe i ku e produktonan òf servisionan preferibelmente mester ta sirkulario. Pa mas informashon tokante Blue Destinastion nos ta referí bo na www.bluedestination.com.