Gobièrnu di Boneiru ta lansa enkuesta pa determiná impakto di COVID-19 riba empresanan na nos isla

Entidat Públiko Boneiru i Kámara di Komèrsio Boneiru ta kuminsá un investigashon pa yuda evaluá, midi i analisá e konsekuensianan negativo di e krísis di COVID-19 pa empresanan. Ta bai usa e enkuesta aki pa un Evaluashon Di Nesesidat Despues Di Desaster (Post-Disaster Needs Assessment – PDNA) mas amplio, den kua ta deskribí e konsekuensianan sosial i ekonómiko di e pandemia pa Boneiru i den kua ta duna guia mas aleu na fitbèk i planifikashon di rekuperashon di gobièrnu. Na aña 2020 gobièrnu di Boneiru a aserká Banko Mundial pa sosten tékniko relashoná ku ehekushon di e PDNA. Komo aporte importante na e PDNA e enkuesta lo enfoká riba un variedat di tópiko, manera desafionan riba tereno di desaroyo di empresa, limitashonnan operashonal i aksesibilidat na medionan.

Gobièrnu di Boneiru i Kámara di Komèrsio Boneiru ta enkurashá tur empresa for di tur ramo empresarial pa yena e enkuesta no mas tardá ku 26 di mart 2021 pa haña un imágen kompleto di e hopi efektonan sosial ekonómiko di COVID-19. E enkuesta ta disponibel den kuater idioma: hulandes, papiamentu, spañó i ingles. Despues di primi riba e boton blou por skohé den huki ariba e idioma preferí. Pa motibu di limitashonnan di e plataforma di enkuesta, por haña e vershon na papiamentu bou di titulo “Portugees”.
Lo presentá e resultadonan di e enkuesta na e ministerionan relevante na Den Haag pa enfatisá e nesesidat pa medidanan ekonómiko mas amplio i integral. 

E enkuesta aki ta sigui den pasonan di un enkuesta anterior ku Kámara di Komèrsio a ehekutá, pa medio di konsentrá su mes riba preguntanan mas amplio ku den sifra ta determiná e impakto finansiero di COVID-19 riba empresanan di Boneiru. Nos ta gradisí bo pa bo koperashon i pa kompletá e enkuesta!