Kompensashon pa un solo biaha di taksi, i kompania di “tour” i di hür outo

Apresiabel empresario,

Pa medio di e karta aki, Entidat Públiko Boneiru kier a informá bo (kompania) di lo siguiente.

Gobièrnu di Boneiru ta introdusí un medida di sosten adishonal pa kompanianan di transporte turístiko. E sosten ta enserá un kompensashon pa gastunan di impuesto di vehíkulo di motor (motorrijtuigenbelasting) di un solo biaha na tur taksi, i kompania di “tour” i di hür outo registrá na Kámara di Komèrsio, den kuadro di e pandemia di Covid-19. Ta trata di un montante di $ 100,- di kompensashon pa kada vehíkulo ku e taksista, kompania di “tour” òf hürdo di outo tin registrá bou di su negoshi.
Por otorgá e kompensashon di un solo biaha akí bou di e siguiente kondishonan:

1. Bo ta inskribí i ta bibá na Boneiru;
2. Bo por demostrá ku e fecha di establesimentu di bo negoshi na Boneiru ta promé ku 1 di mart 2020;
3. Bo a paga impuesto di outo di aña 2020 kompletu;
4. Bo negoshi ta registrá na kamara di komersio Boneiru;
5. Si ta trata di un negoshi di taksi: bo ta e shofùr prinsipal i alabes ta esun ku ta registrá komo responsabel pa e pèrmit, i tin e último dekretonan bálido ku ta demostrá esaki;
6. Si ta trata di un negoshi di hürmentu di outo: bo mester tin komprobante di pago di impuesto, di hürmentu di outo di e tres último lunanan.

Tene na kuenta ku ta pidi e kompensashon pa un vehíkulo ku ta registrá, òf mas bien vehíkulonan di e negoshi ku ta registrá i ku ta aparesé den e sistema di Entidat Públiko Boneiru.

Por apliká pa e medida di sosten aki te ku dia 10 di òktober 2021. Download e formulario di petishon for di https://bonairegov.com/pa/empresarionan/kompensashon-pa-un-solo-biaha-pa-kompania-di-taksi-di-tour-i-di-huer-outo, yen’é, skèn e i mand’é huntu ku e pruebanan pidí i aneksonan via di e-mail na alivio@bonairegov.com. Tambe por entreg’é personalmente na ofisina di Direktorado di Komunidat i Kuido na Kaya Neerlandia 41, for di djaluna te ku djabièrnè entre 8’or i 11’or di mainta.

E kompensashon di $100 ta pa kada vehíkulo ku ta registrá komo vehíkulo di bo negoshi.

Atentamente,
Entidat Públiko Boneiru