Prolongashon areglo di emergensia SZW

Pa evitá ku dunadónan di trabou ta haña nan fòrsá di kita empleado for di trabou, nan por hasi uso di un areglo di emergensia temporal di SZW pa kompensashon di e gastunan di salario. Empresario independiente òf hende ku tabata empleado tambe por hasi un petishon pa e areglo di emergensia aki pa suplementá nan entrada.  Pa motibu di e impakto kontinuo di e medidanan di corona, ta prolongá e areglo di emergensia ku kuater luna mas, te ku mas tarda 12 di òktober 2020.

Dunadó di trabou
Si bo ke hasi uso di e areglo di emergensia komo dunadó di trabou, bo no mester entregá un aplikashon nobo. Loke si bo mester entregá ta un deklarashon indikando un pronóstiko di e empeño di bo personal den e periodo restante di e areglo. Tambe si e situashon no a kambia kompará ku bo petishon original, bo mester entregá un deklarashon.

Ounke ku e kondishonnan eksakto ainda no ta finalisá formalmente, unidat SZW di RCN ta pidi bo pa mas lihé posibel, i sigur promé ku 14 di yüni, entregá bo deklarashon. E punto prinsipal di e areglo ya ta kla i ku yenamentu di e deklarashon bo por konkluí ku e kondishon i eksepshonnan a keda meskos.

E pagonan di e areglo di emergensia ta para te ora ku bo datonan ta risibí i prosesá. Mas lihé bo entregá bo deklarashon, mas siguridat bo tin ku e pago ta sigui sin interupshon.

Empresario independiente
Komo empresario independiente bo no mester entregá un deklarashon pa hasi uso di e prolongashon. Si bo tin entrada atrobe, bo mester, meskos ku ta e kaso awor, mèldu esaki mesora na unidat SZW di RCN via di un formulario di kambio.

Informashon adishonal
Mas informashon tokante e sosten pa empresario for di gobièrnu, bo por mira riba e wèpsait di RCN. Lo komuniká e kondishonnan eksakto pa e prolongashon mas lihé posibel via e wèpsait aki. Pa pregunta i konseho bo por akudí na Kámara di Komersio via steunloket@kvkbonaire.com.