SONDEO TOKANTE MEDIDA DI SOSTEN KOMPENSASHON “ALIVIO”

Kámara di Komèrsio ta bai hasi un sondeo pa Entidat Públiko Boneiru bou di empresarionan tokante un medida di sosten nobo di nos gobièrnu lokal pa gastunan nesesario di biba. Na e momentu aki Entidat Públiko Boneiru ta trahando riba e kompensashon ‘Alivio’. Empresarionan i empleadonan ku tabatin un rekaida serio di nan entrada ku e pandemia di COVID-19 a okashoná, dentro di poko por hasi un petishon na Entidat Públiko Boneiru. Den e fase preliminar aki Kámara di Komèrsio ta pidi empresarionan ku tin intenshon di apliká pa esaki, pa registrá nan mes pa medio di yena algun informashon di manera ku por inventarisá e grupo di enfoke aki. Asina Entidat Públiko Boneiru por tene kuenta ku nesesidatnan di e grupo di enfoke, pa organisá e kompensashon ‘Alivio’ mas mihó posibel.

Den e sondeo Kámara di Komèrsio ta buskando empresarionan di 18 aña bai ariba ku for di luna di mart 2020 tin un rekaida di minimalmente 30% di nan entrada komo konsekuensia di e pandemia di COVID-19 i pa kende e medidanan aktual no ta konta òf no ta sufisiente. Ta trata di empresarionan di kende e entrada total mensual neto di nan kas di famia a baha di forma substanshal i ku no por karga nan gastunan nesesario di biba a base di entrada di e famia, nan kapital privá òf e medidanan di sosten eksistente riba kua ya kaba a hasi un apelashon.

E formulario pa yena online ta aksesibel door di primi abou riba “Registra aki” i ta disponibel durante 10 dia. E formularionan aki ta riba wèpsait di Kámara di Komèrsio tambe: www.bonairechamber.com. Naturalmente lo trata tur informashon na un manera konfidensial. Despues ku a inventarisá e petishon pa ayudo Entidat Públiko Boneiru lo stipulá e kondishonnan di e kompensashon ‘Alivio’, di manera ku por kuminsá ku e areglo aki. Na momentu ku e areglo bini na vigor, den un forma proaktivo Entidat Públiko Boneiru lo aserká e personanan ku a registrá nan mes adelantá.

Pa mas tardá meimei di luna di mei gobièrnu di Boneiru ta spera di por duna mas informashon tokante e organisashonnan di implementashon i binimentu na vigor di e medida di sosten. Kámara di Komèrsio ta invitá tur empresario, ku ta kumpli ku e kondishonnan, pa yena e formulario aki. Ku esaki klaramente ta identifiká e petishon pa ayudo pa por ofresé e empresarionan afektá un sosten adekuá.