1. ALKANSE

 

Pa hasi uso di e sistema di registro komersial di Kámara di Komèrsio i Industria Boneiru, kada dirigente outorisá lo haña un kódigo di akseso personal ku ta duna akseso na hasi deklarashon pa e kompania i/òf organisashon enbolbí den Registro Komersial. Pa hasi uso di e kódigo di akseso akí i pa hasi deklarashon online na Registro Komersial e kondishonnan general akí ta na vigor, ku ta kontené reglanan básiko ku bo tin ku kumpli kuné na momentu di hasi uso di e sistema di registro komersial online. Den e kasonan kaminda e kondishonnan general akí no ta proveé, Kámara di Komèrsio i Industria ta disidí. Derecho di islanan BES ta aplikabel pa loke ta trata e relashonnan entre e kompania/organisashon i/òf su dirigentenan i Registro Komersial.

 

  1. OBLIGASHONNAN DI E USUARIO

 

Relashoná ku registrashon pa hasi uso di e sistema di Registro Komersial online, bo ta bai di akuerdo ku bo ta:

  1. duna informashon eksakto, aktual i kompleto tokante bo mes i/òf bo kompania/organisashon;
  2. entregá tur dokumentashon rekerí pa hasi un deklarashon kompleto;
  3. registrá tur kambio relashoná ku e kompania/organisashon pa mas tardá un (1) siman despues ku e echo a tuma lugá, manera preskribí den artíkulo 8 di Lei di Registro Komersial BES;
  4. entregá prueba mas detayá den kaso ku Sekretario di Registro Komersial ta konsiderá esaki nesesario si e no ta konvensí di e deklarashon risibí;
  5. ku inmediatamente despues ku Registro Komersial a prosesá e deklarashon i e ta disponibel online, bo ta kontrolá esaki ku e ta eksakto i kompleto i ku bo ta mèldu iregularidatnan konstatá inmediatamente;
  6. salbaguardiá konfidensialidat di bo password, kódigo di akseso i otro informashon relashoná ku siguridat di bo account;
  7. kompletamente responsabel pa uso di bo account i pa tur akshon ku ta tuma lugá via bo account;
  8. mèldu esaki inmediatamente den kaso ku bo ta sospechá ku siguridat di bo kódigo di akseso no ta sigur mas, di manera ku nos por blòkia esaki;
  9. bo ta kompletamente responsabel pa eventual daño ku a surgi pa motibu di bo aktuashon òf si intenshonalmente òf pa motibu di negligensia grave no a kumpli ku un òf mas di e obligashonnan menshoná den e kondishonnan general akí i / òf e legislashon i regulashon relevante manera Lei di Registro Komersial BES i Dekreto di Registro Komersial BES.

 

  1. PRIVASIDAT

 

Bo ta bai di akuerdo ku verifikashon di bo identidat na momentu ku Sekretario di Registro Komersial ta konsiderá esaki nesesario, den e kasonan kaminda e no ta konvensí ku ta un persona outorisá a hasi e deklarashon. Pa medio di esaki bo ta duna pèrmit eksplísito pa prosesá bo datonan personal, ku mester keda registrá den Registro Komersial konforme e Dekreto di Registro Komersial BES, den nos sistema. Datonan personal ta datonan ku ta duna informashon tokante un sierto persona (por ehèmpel sekso, fecho di nasementu, adrès). Datonan personal pa definishon no ta públiko, a ménos ku legislashon i regulashon ta stipulá otro.

 

  1. KANSELÁ KÓDIGO DI AKSESO

 

Semper Kámara di Komèrsio tin mag di kanselá e kódigo di akseso òf blòkia akseso di un usuario, den kaso ku Kámara di Komèrsio ta konsiderá esaki deseabel (por ehèmpel den e kasonan kaminda un usuario no ta outorisá pa representashon mas).

 

  1. AKSEPTASHON DI KONDISHONNAN GENERAL

 

Pa medio di hasi uso di e kódigo di akseso bo ta deklará i garantisá ku bo akseso i uso di nos sistema di registro komersial online lo ta di akuerdo ku e Kondishonnan General akí i ku tur leinan, reglanan i instrukshonnan aplikabel, inkluso esunnan relashoná ku komportashon online.